Nga Dr.Nurian Ohri më 30 Maj 2008 nën Kirurgjia , 6,597 lexime 7 Komente  Dërgo me Email

Variçe quhet zgjerimi i venave në trup por në përgjithësi përdoret për zgjerimin e venave në këmbë tek zona e pulpës ose pas gjurit. Ato zgjerohen, fryhen dhe përdridhen nga grumbullimi i gjakut në to. Gjaku në këmbë ngjitet sipër me anë të muskujve të këmbës dhe me anë të kapakëve që gjenden në vena duke penguar edhe kthimin mbrapsh të sasisë së gjakut të hedhur sipër. Nëse këta kapakë dëmtohen atëherë gjaku nuk do të mund të lëshohet sipër dhe për më tepër do të grumbullohet nëpër vena pasi kapaku është ai që mbyllej pas çdo shkëputje të gjakut sipër duke mos e lënë të bjerë poshtë me forcën e rëndesës.
Shenjat janë të tilla si fryrje të këmbës, dhimbje, lodhje, ngërçe e këmbës dhe një ndjenjë sikur të bëhet mishi miza miza. Gjatë menstruacioneve tek femrat dhimbja dhe fryrja e këmbëve mund të rritet. Variçet shihen më shpesh tek të moshuarit dhe zakonisht tek ata që janë mbipeshë, që rrinë shumë në këmbë dhe tek shtatëzanet. Gjithashtu jo vetëm në këmbë por edhe në vulva (pjesa që shihet nga jashtë e organit femëror), apo në anus e rektum(pjesa e fundit e zorrëve të trasha) megjithëse më rrallë se në këmbë. Këtyre të fundit pra në fundin e zorrës së trashë u thuhen edhe me emrin hemoroide për të cilat do të flasim një herë tjetër.Trashëgimia dhe shtatëzania ndikojnë tek variçet. Por zakonisht variçet e dala për herë të parë në shtatëzani pas saj mund të zhduken.

Përse krijohen variçet gjatë shtatëzanisë?
Për disa arsye:
1) Sepse sasia e gjakut tek nëna për shkak të bebit rritet.
2) Sepse në muajt e fundit kur fetusi është rritur pak krijon presion duke shtypur venat kryesore dhe duke penguar ngjitjen e gjakut sipër.
3) Sepse rritet niveli i progesteronit një veti e të cilit është ajo e dobësimit të muskulit të damarëve duke i zbutur ata.

A e pengojnë variçet e vulvës shtatëzaninë?
Jo. Por nëse lindja do të bëhet me anë të një çarje të quajtur epiziotomi (bëhet për të zgjeruar paksa vaginën për një dalje më të lehtë dhe më pas ajo pjesë qepet menjëherë pas lindjes) prania e variçeve do ta pengonte pak këtë proçes për shkak të hemoragjisë.Megjithatë është e mundur edhe hapja e epiziotomisë në një pjesë ku nuk ka variçe. Konsultohuni me gjinekologun tuaj për këtë problem.
Gjatë shtatëzanisë nuk është mirë që të bëhen operacion variçet veçse nëse mjkeu specialist duke u bazuar në shqetësimet tuaja (dhimbje të forta apo çarje të variçeve) e miraton këtë.

Ç’duhet të bëj me variçet?
Mundohuni të mos qëndroni për një kohë të gjatë në këmbë. Nëse ju duhet ta bëni herë pas here uluni dhe ngrijini pak këmbët për rreth 30 minuta.
Mundohuni të mos qëndroni këmbë mbi këmbë teksa jeni ulur.
Mos vishni këpucë me taka dhe të ngushta.
Bëni rregullisht gjimnastikë për këmbët dhe pulpat e tyre.
Mund të përdorni ilaçe dhe çorape të posaçme por veçse me këshillen e mjekut specialist.
Ulni peshën tuaj nëse jeni mbipeshë.
Mundohuni të mos bëheni kaps (konstipacion).
Mundohuni të ecni po jo sa të lodheni pasi ecja ndihmon në kontraktimin e muskujve dhe në lëvizjene gjakut sipër.
Kur të flini vendosini këmbët mbi një jastëk.
Nëse variçet kanë përparuar shumë mund të bëheni operacion por këtë e vendos kirurgu i përgjjithshëm ose kardiokirurgu pasi edhe variçet në mjekësi kanë gradat e tyre dhe jo çdo gradë e ka të nevojshme operacionin.

                                                                                                                             Dr.Nurian Ohri

                                                                                                                          www.mjeku24.com